Gabriele Tanda est maistru de iscola e imparat su sardu in s’Universidade de Tàtari. Dae minoreddu si perdiat in sos tempos colados, bisende cavalieris medievales e casteddos, gherreris nuràgicos e domos de janas, cun s’ispera de unu biàgiu in sas edades antigas pro sarvare sos bonos dae sas disauras chi los aiant ochidos. Barigada sa pitzinnia at istudiadu Istòria e Literadura e at cumpresu chi sa fantasia sua non fiat nudda a cunfrontu cun sa realidade. Pro custu proa a imbitzare sos minores a connòschere sos contos de s’antigòriu.