FEDERICO GARCÍA LORCA (Fuente Vaqueros 1898 - Víznar 1936), poeta e drammaturgu, at fatu parte de su grupu de artistas ispagnolos mutidos ´Sa generatzione de su ´27´. Tzentros de sa vida e de s´atividade sua sunt Granada e Madrid. In sa capitale s´abitat cun artistas che a su poeta Rafael Alberti, su regista Luis Buñuel e su pintore Salvador Dalí. In sa tzitade andalusa si làureat in Lege. Iscriet Canciones, Romancero Gitano e Poema del Cante Jondo, publicados intre su ´27 e su ´31, e galu Poeta en Nueva York e Tierra y Luna. In su ´31 ddu faghent diretore de sa cumpangia teatrale "La Barraca", patrotzinada dae su guvernu republicanu. In su ´32 iscriet Isposòriu de sàmbene, e a coa Yerma e La casa de Bernarda Alba. Morit fusiladu dae sos franchistas pro sas simpatias republicanas.