«Chini at a lìgiri custus contus s´at agatai a manu pigada in unu mundu chi su coru sû at a torrai a connòsciri poita est su tempus de su coru a chistionai. Sèmpiri. Ma no isceti. At a biri cantu, custu iscritori e poeta, at postu in su contivizu amurosu de sa lingua, cantu istùdiu, cantu trabballu e sacrifìtziu, cantu amori. Po pòdiri torrai a is àterus, in milli arritzolus, totu custu isciri sû guadangiau cun deditzioni manna.» dae sa presentada de Anna Cristina Serra
Custa regorta de contos est unu de sos risultados de su progetu “Biblioteca Casa di Quartiere”, aparitzadu dae su Comune de Ceraxius, finantziadu dae su Mibact cun su bandu “Cultura Futuro Urbano” e cuncordadu dae sa Biblioteca Comunale. A intro de custu progetu, sa domo editora Condaghes at aprontadu unu cursu pro imparare a fàghere sos libros eletrònicos. A s´agabbu de su laboratòriu, cun sa collaboratzione de sa Fundatzione Faustinu Onnis Onlus, sos dischentes ant realizadu s´eBook in onore de unu de sos poetas e iscritores in limba sarda prus connotos de Sardigna.
Faustinu Onnis (Santu Èngiu, 1925 – Ceraxius, 2001) est istadu unu de sos poetas in limba prus mannos de sos ùrtimos tempos. Òmine de gabbale, at dedicadu totu sa vida a istudiare e valorizare sa limba e sa cultura de Sardigna. Pro medas annos at collaboradu a sa rivista “S´Ischìglia” e at fundadu e diretu sa rivista “Paràulas”. Un´àtera parte importante de s´atividade sua est istadu s´impignu in prèmios literàrios medas: mescamente cussos de Otieri e su Prèmiu Campidanu. A intro de su libru podides lèghere sa biografia cumpleta sua.